Kako postati pravi jadriličar

Svitu moj, od mora i kraja, svi vi ča bi htili biti pravi jadriličari, nema van druge nego poslušati ča van ima reći oni ča je svoj zanat ispeko, ča oće reći, mene na primjer, Šimu Pitura.

 

Ima onih judi ča se rodu u jadrilicami, čin su in prvi zubi izašli već su ih upisali u Klub, a sa dvi-tri godine su bili bar na Barcolani, ko već nisu bili kolo svita, bar dva-tri đira. E, to su, rečimo na primjer, oni judi ča vridu, jadriličari od kolina. To da je njima već pokojni did bi jadriličar na Olimpijadi kod Hitlera, to van je isto kjaro ka sunce u burni dan.

Jasno van je i to da ih je u peleni u jadrilicu hiti njihov pape, a ni mati in ni bila daleko, iako je ona pura vlajna iza brda i more je ni baš po volji, ma, ča će, boje je da je ona na brodu nego neka kurbetina uz muža joj floćuna. Tako van to gre, svitu moj. Jadrilica se dobije od dida, Pape je proda i kupi dvi postole dužu i postolu širu, i to onaj model od plastike, ča imo školjku o kunduta i pećicu na plin, da lipo moreš obed skuvati kad te ćapo gladuša.

Kad dojde red na tebe, nemo ti druge nego učiniti veli trošak i izvaditi devize ča si ih stavi ispod armeruna za učiniti kuću na tri kata.

Čin si na sajmu u onon Beogradu na moru vidi kakove su cine, bilo ti je jasno da će kuća imati bar kat manje. Svragon i kuća, ionako ste ti i žena skoro uvik sami u njoj, dica su pošla svojin puten i ča će van više sob za luštrati cakla i glancati parketi. E, znači i to smo uredili.. šoldi su parićani, jadrilica se našla, i sad triba urediti ono ča je najgore.

Svitu moj, jeste li vi vidili koliko u ovin našen kraju ima brodov, kad su svi našli di će se vezati, vajda će se i za vaš novi ponos i imovinu o plastike najti koji bokunić rive oli marine.

I .. unda, vi onako kakvi ste, malo plesnuti, odete pitati u marinu da koliko je cina za zavezati brodić na godinu. Untiii irudaaaaa!!!

Ako vas unda ni udri kap u srce i onaj drugi u mozak, nikada i neće.. Posli razgovora su van tri ure davali umjetno disanje, masažu o srca i onu infužiju u žilu. Jedva su vas škapulali!

Šest ijad, šest ijad euri za godinu! Plzus pedeve ! Šest ih kuxxxov jxxxxo! Za onaj gnjili konop i po metra rive! I to, da se morate upisati u red, i da će van poslati unaj emajl kad se učini misto za imovinu.

Posli toga ste pošli u unu firmu ča je ka gradska, oli od županije, ki će ga znati sada, sve je to isto, ka da ih je isti ćača učini, svi imaju isti mot i isto govoru.

Da triba učiniti zahtjev, kad se u Narodne novine na inkternetu napiše da je natječaj za ti vrazi od veza, i da tribaš biti atento kako bi prvi sa preporučenon pošton posla zahtjev za oti vez, i da će oni zaprimiti onaj ča se prvi pošalje, i ako na pečatu pošte bude pisalo da si ti prvi, onda će tebi dati vez. Prije toga tribaš ispuniti upitnik na osan stranic, kupiti taksene marke i u pošti učiniti uplatnicu na 8 kuni 30 lip, za trošak pošte. A, kad bi moglo biti, taj vaš natječaj?

Da mi ne moru reći, jerbo da bi to povridilo slobodu tržišnog natjecanja i jednakost svih u natječaj.

Mene su našli! Ko da ja ne vidin odokle ovaj vitar puše. Nis ni ja baš toliko plesnut da ne vidin da od ovog boga županijskog neće biti ništa, a ni ovi građani mi baš nisu nešto.

Nema meni druge nego pojti u Klub, učlaniti se i postati prvorazredni jadriličar od kolena. Nemo veze ča mi je did jadri samo na gajeti kad su se vraćali iz polja, nema veze ča mi pape nikad ni ima ni sandolinu a komoli jadrilicu, triba se najti neki napredni, ka ča san, rečimo na primjer ja, i kupiti tu vražju jadrilicu od plastike.

Kad si doša u Klub, rekli su ti da je koje su ti kompletencije, da jesi li idri na Olimpijadi joli na Svickon kupu o jedrenja u zadnjih 8 godin. Jer, da ko nisi materijal od te vrste, da moraš učiniti zahtjev na odbor, i unda će oni tebe dobro promotrit i viti jesi li ti materijal da budeš član kluba joli ne..

I da bi bilo dobro i o koristi da ti neki ča je bi na olimpijadu napiše niko pismo, ka preporuku, da si ti drug i starešina, i da ti je skoro pa jasno di je krma a di prova i te neke lipe stvari. Majketi, ka da ovi sa olimpijadama restu okolo ka zelena salata u babe mi.

Za jednu, pet šest miseci, ovi glavešine u Klubu će se naći na pivu, pogledati će sve ča si nakiti, sve te lipe preporuke, i unda ćete, ko bog da, primiti u Klub. Za prvu ruku, jedno, dvi-tri godinice ćeš biti ka pripravnik, posli kad uni vidu da si ti karakter i čovik na svon mistu, primiti ćete ka za svoga. Kako je i red, ti ćeš unda hoditi okolo i častiti svakoga ki ti se učini da je od nekog položaja u Klubu, jer tako i triba. Prije toga, a dok si još uvik pripravnik, tvoje je da si svaki dan u Klubu, da vidiš ima li koga, da se javiš onima ča ih poznivaš i onima ča nemaju pojma ki su, da si se nacrta na svaku regatu, da čekaš ki će te ukrcati na brod i otrpiti malo te tvoje munještine i to ča svaki put iz prve nisi sigur jel naprid prova ili se nekako drugačije to zove. A ne boj se, biti će toga, laškaj brac, karikabaso ti je prekacan, dric po provi, kacaj karocu, molaj štraj, laško gindac, kalaj špin, gori drifter, nisi ga ni dovuka gori, opet neka manovra za doli, digni genaker,gori, doli, livo desno, sve dok ti se ne sve lipo ne pomiša i dok ne budeš više zna kako se zoveš.

Kad te iskrcaju na rivi o kluba, učiniti će ti se da si proša centrifugu na ijadu.. i ništa ti više neće biti jasno, ni ki si , ni kako se zovež, ni koga vraga imaš s tim munjelama ča se samo deru na svoje i na ove druge, samo nešto dižu i skalivaju, ne moru stati u miru ni minutu a da neki konop ne triba natezati joli laškivati..

Cijelin puten će ti u glavi biti tvoj lipi talijanski kauč od kože ča ga je žena kupila sakreto a da ti ni rekla koliko gusta, i kako bi ti moglo biti lipo da se nisi ukrca na tu vražju jadrilicu i da si sta doma, ka i svi drugi normalni judi ki nemaju potribu biti članovi o Kluba jedrilic i onih ča se tako osićaju.

Ma najgore od svega na svitu je da ćeš čin ti daju da nešto poiš i popiješ opet dojti u taj paka i opet učiniti prijavu za onu drugu regatu ča je na redu za misec dan.

Kako to lipo piše u izvještaju o policijoti: “Osumljičeni je samoinicijativno pristupio skupini sportskih rekreativaca, usprkos višestrukim i opetovanim upozorenjima nazočnih, aktivno sudjelovao u beskorisnim kretanjima te time počinio značajnu materijalnu i nematerijalnu štetu na vlastiti trošak. Sam pao, sam se ubio!“

Jašta!

 

Šime Pitur

 

Možda će vas i ovo zanimati..

Livi bek
Livi bek Kako uspit...
Ki je ki u našemu Klubu
Ki je ki u našemu Klubu “Kako je d...