Ki je ki u našemu Klubu

“Kako je dobro kad si na Vlasti
A Vlasta je bogata i Vlaste te časti.. „ Pips,Chips&Videoclips

 Šime Pitur - Ki je ki u našem klubu

Prije ovoga, bilo me je u još dva, tri.. I svi su isti, ko da ih je sve isti ćaća napravi...

Je, u onome jednome smo tukli u one golube o gline, u onome drugome smo tekli vamotamo za lopton, a u ovome zadnjemu rastežen konopi i lancuni o plastike.

I ča mislite, svitu moj, u čemen je tote konekcijun da mi svi ovi sliču jedan drugome ka dva jaja o iste kokoše.

Prvo i prvo, u svakon se od njih odma mora znati ki je na vlasti a ki ni.

Oni ča su na vlasti su glavni, i šnjima triba biti u dobre! Moreš ti biti munjen koliko očeš, ma to ti je odma jasno ka dan, jel tako?

Problematikatno je da su ovi vrazi na vlasti prevrtljivi, malo su na vlasti, pa malo nisu, svako malo neki od nji završi u pržunu jer je napravi neki takac-makac, tako da uvik triba biti dobar i sa ovima ča ka sada nisu na vlasti.

To van je svitu moj, čudo konplikato.

Najboje je to sa Vlaston naslikala jedna pisma od onih nikih čupavih iz Zogreba,
“ Kako je dobro kad si na Vlasti
A Vlasta je bogata i Vlaste te časti.. „

To san ja nauči da se zove miroljubiva aktivna koegzistencija.

Samo, ča ovde nemo crnih, žutih i kosookih, nego je sve to naš dobar i pošten svit ča nedijon malo manje gre na misu u crikvu. Ali, oni to sve lipo poštivaju i ako već nisu od litanije, neće praviti barufu nego će lipo odvesti ženu in u crikvu a oni će do broda joli kafića u Klubu, dok misa i pričest i sve te lipe stvari ne frmaju.

Tamo di je Vlast, uvik imaš i ovih drugih..

Ča ću van svitu moj govoriti, kad sve već znate..

Ti nenarodni elementi ništa i nikoga ne poštivaju, ni Vlast, ni Vlastu, samo činu barufu i škodu svima poštenin radnin judima i građanima u našemu Klubu.

Oni su vam, svitu moj, uvik antiprotivni, govoru da ovo ni dobar klub, govoru da ima više onih bojlerov ča ih zovu gliserima nego jadrilic, da se tebe boga ni napravilo za one ča volu ove lancune i konope, govoru protiv ovih ča su na vlasti i to da oni Klub i sve ča je u njemu koristu ka da in je ćaćino, govoru da klub 20 godin ni napravi tečaj jedranja za ove punopunoljetne, govoru da je u onome drugon mistu Klub puno boji nego kod nas, govoru da je tamo puno drugovačije nego ča je to u našemu klubu i sve te lipe stvari..

Ako ste pametni, najboje van je sa njima ne imati puno posla. Dosta će biti, s vrimena na vrime popiti kafuu sa nekin od njih i to najboje kad vas niko ne vidi.

Nedajbože da se s tin antikristima nalazite u Klubu, pamet u glovu!!!

Puno van je boje, ako ste već toliko zaglibili, da najdete neki lipi kafić na kolodvoru o žejeznice i da tamo rečete njima da sve ča oni govoru je živa istina i da ste in vi tote na raspolaganju sto posto za sve ča in bude tribalo.

Naravski, to ste već rekli i onin drugin, ča su sada na vlasti, to se valjda samo od sebe razumi..

Kako u svakon sukobu uvik ima i treća strana, ti su najboji. Kada su onog muslimana Aliju od Bosne pitali, da ki puca po njima, on je unda reko da to puca Treća strana. U ti san ja čas nauči da je Treća strana čudo moćna i kruto važna.

Treća strana muči, ništa ne govori, ne moreš je uvatiti na baketinu ni za jedne ni za druge. Oni se samo vajaju ulivo-udesno i poznati su po nazivu šotobandijerosi iliti kako vitar puše.

Za nji nema straha, oni u čas sve učinu, najdu vez, izvade brod na dizalicu preko reda kad je najveća gužva, premistu brod na drugo misto jer in tamo di su sada ni po guštu vez i onaj munjela ča imo brod do njih..

Nama straha da ćeš ove viditi da će se navući na neki posao u kojen nema šoldi, nema šanse da će se uvatiti neke regate za punopunoljetne člane Kluba, nedajbože za dicu, atroke nešto učiniti u Klubu, joli tako nešto.

To su, oni ča ih ja zoven, Nit prdi- Nit smrdi! Osin za svoju korist!

Pripametni su grupa koja je isto oduvik brojna i za viti ih je na svakon kantunu o Kluba. To se posebno oćuti kada izvadiš jadrilicu ili kaić na kraj i kad triba nešto učiniti na njoj, zavidati, zalipiti, zakitati, piturati, prominiti štraj, popraviti timun, čakod zaplastificirati i sve te lipe i boguugodne rabote.

Oni znaju sve, osin ča ništa ne znaju kako triba i do kraja. Je, ako ne znaju učiniti, zato znaju govoriti i prosipati pamet po škveru.

Od njih ne moreš niti jedan posa finiti a da ti oni ne dojdu prismrditi tvojoj raboti i dati ti dva-tri kruto pametna savjeta koje nisi pita.

To je zato jer su pripametni i sve znaju. Okalaj ih se ako ikako moreš..

Sve ove grupe imaju i svoje frakcije. Ko van ni jasno ča su frakcije, sa ću van ja nacrtati da zapametite .

Rečimo na primjer, more biti da dotični naginje onima nenarodnima ča nisu na vlasti, ma kruto voli bumbiti. I sada, to ča on ni na vlasti, to ne znači da neće sesti za stol sa ovima mrskima ča su na Vlasti, ako se u Klubu ima ča za bumbiti, pogotovo ako je muktakis. U ton se slučaju zaboravi pripadnost i uvjerenje, i privremeno si član Frakcije Bumbimir Muktakis.

Slično se dogodi i kada se ima čagod hititi podzub. U takvin iznimnin slučajevin pod hitno proradi neprincipijelna koalicija i zaboravi se sve ča se grubo izgovorilo o ovome dugome. To traje sve dok se ne uništu materijalni dokazi zašto je došlo do primirja. Ča je više i bolje spize na pladnju, primirje je uspješnije.

Da bi se uspješno ostvarilo primirje, ima jedna peršona ča je od kjučnog povjerenja od svih struktur u klubu. Nema veze jel si u pitanju ti, ča si, rečimo na primjer, na vlasti, ili ona nenarodna opozicija ča samo bruntula i pravi čirkus po Klubu, pravoga Kuvara svi tribaju. To je čovik ča će ti čim prominiš nasupane bičve pune mora i presvučeš tvoje superupijajuće mudante, pružiti pijat lipog, teplog gulaša sa govedinom bez ijedne žilice, i još će ti poduplati porciju kad te vidi onako promrznutog i stisnotog ka pet dinari sira.

To da je Kuvar čovik na svon mistu, znaju i ovi ča mora nikad nisu vidili, ča ne hodu na regate ma se isto okrznu o teću, kad in je blizu. Jerbo, kad si sta ured od Kuvara, posta si član naroda, i red i krijanca je da i ti uvatiš porciju ka i svi drugi ča su tote.

Kako je i Kuvar, čovik, drug i starešina, tvoj je obligacijun da mu onako, judski rečeš kako mu je gulaš bi.. nego tako, i da mu bar za Božić doneseš jednu bočicu o sedandeci, da se i Un oćuti kako čovik o povjerenja i pozicije u Klubu.

Da bi vi judi moji, vidili ča je i koliko značajna njegova pozicija, evo van jedna storija ča ni nikad izašla u novine, ma meni su je došapjali iz povjerljivih izvori..

Govoru da je u Klubu jedan put bi niki iz Ujedinjeni narodi iz Nevjorka, i da je dove sobon onog Arafata i ove iz Izrajela, nebi li in pokaza kako bi tribali složiti puno spize i vina, dobro se ponapijati i naisti, te zaboraviti zašto se tuču već dvi-tri ijad godin. Za tu delikatu poziciju su u klubu odredili čovika o najvišeg povjerenja, ča oće reći, Kuvara..

I onda, da su se oni složili da je to grejt ajdia, ma izgleda da je puklo odmah na meniju.. jedni su htili kupiti janjetinu, a ovi drugi svinjetinu sa sajma u Benđo sitiju, i da su se skoro pobili oko toga još dok su bili kod nas u Klubu.

Posli da je bilo još i gore kad su došli doma i uvatili se gađati roketama i reoplanima.

Ispod glasa se govorilo da su jedni pritili da će poslati tajnu službu da otme Pricidnika o kluba, jer da ča se on imo mišati u te svicke stvari kad i kod njega doma ništa ni kako triba, a ovi drugi, da će usred lita podmetnuti bumbu u sladoled kad donesu pun kamijon one najboje vanilije sa čikolaton.

A munjena svita..,

Tako, da kada se sve skupa to zavrti, šćeto-neto, još je kod nas u Klubu i dobro kakvog sve svita ima okolo!

Šime Pitur 

Možda će vas i ovo zanimati..

Livi bek
Livi bek Kako uspit...